Mübariz İbrahimovun heykəli



Milli qəhrəman Mübariz İbrahimovun heykəlini yaratmaq heykəltəraşımız Vüqar İmanquliyevi çoxdan düşündürürdü. Vüqar bu mövzuda 10-a yaxın eskiz hazırlamışdı. Sonda isə Mübarizin döyüş zamanı əldə silah hücuma keçən vəziyyətdə təsvir olunduğu eskiz üzərində qərarlaşan heykəltəraş bu eskiz əsasında milli qəhrəmanın heykəlini yaratmağı qarşısına məqsəd qoydu. Heykəlin hazırlanmasına 2011-ci ilin mart ayında başlanmışdır. İşlər 4 ay davam etdikdən sonra nəhayət iyun ayında möhtəşəm heykəl hazır oldu. 2.2 metr hündürlüyündə olan bu heykəl öz əzəməti ilə seçilir. Heykəlin gipsdən hazırlanmış versiyası hal-hazırda Azərbaycan Dövlət Rəssamlıq Akademiyasının foyesində saxlanılır.

Heykəlin nisbətən kiçik modeli Tovuz rayonunda ön cəbhədə yerləşən N saylı hərbi hissəyə təqdim edilib. Heykəli görən yerli icra hakimiyyəti orqanı nümayəndələri onun böyük formada Tovuz rayonunun görkəmli yerlərindən birində ucaldılmasını təklif ediblər. Heykəltəraş bu təklifi səmimiliklə qəbul edib və öz razılığını verib. Bizdə olan məlumata görə artıq orada abidənin yerinin hazırlanması üçün müəyyən qazıntı işləri aparılır. Yaxın gələcəkdə Tovuz rayonunda Milli qəhrəman Mübariz İbrahimovun heykəli ucaldılacaq.